མཁན་པོ་ངག་དབང་བློ་གྲོས། Khenpo Ngawang Lodoe

༄༅། །སེམས་ཅན་ཐམས་ཅད་ལ་ཁམས་ཡོད་པ་ལུང་རིགས་གཉིས་ཀྱི་སྒོ་ནས་སྒྲུབ་པ་དཔྱད་གླེང་བཞུགས་སོ། །

བསྐལ་མང་གོང་ནས་རྡུལ་བྲལ་མཚན་དཔེ་ལྡན་པའི་སྐུ། །

བཅོས་མིན་ཚུལ་སྤངས་ཟབ་ཅིང་རྒྱ་ཆེ་བདེན་པའི་གསུང་། །

རྣམ་མཁྱེན་ཡེ་ཤེས་ཟག་པ་མི་མངའ་འོད་གསལ་ཐུགས། །

ཐུབ་དབང་དྲང་སྲོང་ཆེན་པོར་སྒོ་གསུམ་གུས་པས་འདུད། །

ཅེས་མཆོད་ཡུལ་གོང་མ་རྣམས་ལ་བསྟོད་ཕྱག་སྔོན་དུ་བཏང་སྟེ་གང་ཞིག་གླེང་བར་བྱ་བའི་དམ་པའི་ཆོས་ཀྱི་རིམ་པ་ནི། སྔ་འགྱུར་རྙིང་མའི་དགོན་ཆེན་དྲུག་གི་ཡ་གྱལ་ཞེ་ཆེན་བསྟན་གཉིས་དར་རྒྱས་གླིང་དུ་བདེ་གཤེགས་སྙིང་པོའི་སྐོར་ལ་བགྲོ་གླེང་གི་དུས་འདིར། དེ་བཞིན་གཤེགས་པའི་སྙིང་པོ་འགྲོ་བའི་རྒྱུད་ལ་ཡོད་པ་རིགས་པ་གསུམ་གྱི་སྒོ་ནས་གཏན་ལ་འབེབས་ཚུལ་སྐོར་ཅུང་ཟད་གླེང་བར་བྱ་བ་ལ། ༡ ཁམས་སམ་རིགས་འགྲོ་བའི་རྒྱུད་ལ་ཡོད་པ་ལུང་གི་སྒྲུབ་བྱེད་བཤད་པ། ༢ གཏན་ཚིགས་ཀྱི་སྒོ་ནས་མདོར་བསྟན་པ། ༣ དེ་ཡི་དོན་རྒྱས་པར་བཤད་པ། ༤ བདེ་གཤེགས་སྙིང་པོའི་མཚན་ཉིད་དེའི་ངོ་བོ་ཇི་ལྟར་བསྟན་པའི་ཚུལ། ༥ བཀའ་བར་མཐའ་གཉིས་ཀྱིས་བྱང་ཆུབ་གཏན་ལ་འབེབས་ཚུལ་དགོངས་པ་འགལ་མེད་གནད་གཅིག་ཏུ་ངེས་པའི་རྒྱུ་མཚན་བཤད་པ་ལྔ་ལས།

དང་པོ་ནི། ཏིང་འཛིན་རྒྱལ་པོ་ལས།༡ དག་པ་དྭངས་བ་འོད་གསལ་བ། །མི་འཁྲུགས་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་དང་། སྐོང་བཤགས་རྡོ་རྗེ་ཐོལ་གླུ་ལས།༢ བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་ཅིང་། །འགྲོ་བ་དེ་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །ཅེས་དང་། །རྒྱུད་བླ་མ་ལས།༣ རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །སངས་རྒྱས་ཡེ་ཤེས་སེམས་ཅན་ཚོགས་ཞུགས་ཕྱིར། །རང་བཞིན་དྲི་མེད་དེ་ནི་གཉིས་མེད་དེ། །སངས་རྒྱས་རིགས་ལ་དེ་འབྲས་ཉེར་བརྟགས་ཕྱིར། །འགྲོ་ཀུན་སངས་རྒྱས་སྙིང་པོ་ཅན་དུ་གསུངས། །ཞེས་སོ། གཉིས་པ་ནི། འབྲས་བུ་ལྟོས་པའི་རིགས་པ་དང་། ངོ་བོ་ཆོས་ཉིད་ཀྱི་རིགས་པ་དང་། རྒྱུ་བྱ་བ་བྱེད་པའི་རིགས་པ་དང་གསུམ་གྱིས་གྲུབ། དེ་ཡང་དང་པོ་འབྲས་རྟགས་དང་། ཕྱི་མ་གཉིས་རང་བཞིན་གྱི་རྟགས་ཡིན། དང་པོ་དག་པ་གཉིས་ལྡན་གྱི་འབྲས་བུ་རྟགས་སུ་བཀོད་ནས་ངོ་བོ་ཡེ་དག་གི་སངས་རྒྱས་ཡོད་པར་སྒྲུབ་ཅིང་། ངོ་བོ་ཡེ་དག་དང་། དག་པ་གཉིས་ལྡན་གྱི་སངས་རྒྱས་གཉིས་ལྡོག་ཆ་ཐ་དད་ཀྱི་སྒོ་ནས་འཇོག་གོ །སེམས་ཅན་སངས་རྒྱས་ཡིན་ཞེས་པ་རང་བཞིན་རྣམ་དག་གི་སངས་རྒྱས་ཡིན་པས་སེམས་ཀྱི་ཆོས་ཉིད་ཡིན་གྱི་དེའི་འབྲས་བུ་མིན་པས་རྒྱུ་ལ་འབྲས་གནས་ཀྱི་སྐྱོན་ཡང་མེད་དོ། །གསུམ་པ་ནི། ལུས་ཅན་ཀུན་ཆོས་ཅན། རྟག་ཏུ་སངས་རྒྱས་སྙིང་པོ་ཅན་ཡིན་ཏེ། རྫོགས་སངས་སྐུ་ནི་འཕྲོ་བའི་ཕྱིར། །ཞེས་པའི་རྐང་པ་དང་པོའི་དོན་ནི། ཡང་དག་པར་རྫོགས་པའི་སངས་རྒྱས་ཀྱི་སྐུ་མཐར་ཐུག་པ་ཆོས་ཀྱི་སྐུ་ཡོན་ཏན་ནམ་མཁའ་དང་མཉམ་པ་དེ་ལྟ་བུ། སྔོན་ཐ་མལ་པ་འཆིང་བ་ཀུན་ལྡན་དུ་གྱུར་པའི་གང་ཟག་གི་རྒྱུད་དེ་ལས་ཕྱིས་གསལ་བའམ། འཕྲོ་བའམ། མངོན་དུ་གྱུར་པ་ཡོད་པས་ན་ད་ལྟ་ནས་གཞི་སེམས་ཅན་གྱི་རྒྱུད་ན་བདེ་གཤེགས་སྙིང་པོ་ཡོད་ཅེས་སྒྲུབ་པ་ཡིན་ནོ། །

• ༡༽ སྡེ་དགེ་བཀའ་འགྱུར། མདོ་སྡེ་པོད་རྟགས་ ༼ད༽ ཤོག་གྲངས་ ༤༦ ནང་དུ་གསལ།
• ༢༽ ཀློང་ཆེན་སྙིང་གི་ཐིག་ལེ་ཤོག་གྲངས་ ༥༧༠ ནང་དུ་གསལ།
• ༣༽ རྣམ་གླིང་དེབ་གཟུགས་ཤོག་གྲངས་ ༡༩ ནང་དུ་གསལ།

མཁན་པོ་ངག་དབང་བློ་གྲོས། སྨིན་གྲོལ་གླིང་།