སློབ་དཔོན་དམ་ཆོས་རྡོ་རྗེ། Lopen Damcho Dorji
གསུང་བཤད་པའི་རྣམ་ཐར་སྙིང་བསྡུས། Brief Speaker Profile[edit]
སློབ་དཔོན་དམ་ཆོས་རྡོ་རྗེ། རྟ་མགོ་ནང་དོན་རིག་པའི་གཙུག་ལག་སློབ་གྲྭ། འབྲུག་ཡུལ་གྱི་བྱང་ཕྱོགས་དགའ་སར་འཁྲུངས་ཤིང་། དགུང་ལོ་ ༡༠ ་ནས་འཁྲུངས་ཡུལ་གྱི་ཉེ་འདབས་སུ་འབྲུག་པ་དཀར་བརྒྱུད་པའི་དགོན་པ་ཞིག་ཏུ་ཆོས་གྲྭ་ཞུགས་ནས་འབྲུག་ལུགས་ཀྱི་གར་ཐིག་དབྱངས་གསུམ་སྦྱང་པ་གནང་ཞིང་། དགུང་ལོ་ ༡༥ ་ནས་འབྲུག་ཡུལ་སྤུངས་ཐང་ཁ་ལེགས་བཤད་འབྱུང་གནས་བཤད་གྲྭར་ཞུགས་ནས་སྒྲ་སློབ་ལེགས་བཤད་རྒྱ་མཚོ་སོགས་ནས་སུམ་རྟགས་དང་སྙན་ངག་དབུ་ཕར་གྱི་གཞུང་སོགས་གསན། ༢༠༡༠ ་ལ་འབྲུག་ཡུལ་རྟ་མགོ་ནང་པའི་གཙུག་ལག་སློབ་གྲྭ་ནས་བསྟན་བཅོས་མཁན་གྱི་ལོ་རིམ་གསུམ་མཐར་ཕྱིན་རྗེས་འཕགས་ཡུལ་དུ་ཕེབས། གདན་ས་ཆེན་པོ་སེར་བྱེས་མཁས་སྙན་གྲྭ་ཚང་དུ་ལོ་ལྔ་ལྷག་ཙམ་ཞིག་སློབ་གཉེར་མཛད་དེ། སླར་འབྲུག་ཡུལ་དུ་ལོག་ནས་འབྲུག་པ་དཀར་བརྒྱུད་པའི་ཆོས་སྡེ་རྡོར་གདན་ནང་པའི་གཙུག་ལག་སློབ་གྲྭར་ལོ་ལྔ་ཙམ་བསམ་གསན་མཛད་དེ། ༢༠༢༡ ་ལ་འཛིན་གྲྭ་མཐར་ཕྱིན་ནས། དེང་སང་རྡོར་གདན་ནང་པའི་གཙུག་ལག་སློབ་གྲྭར་སློབ་དཔོན་གྱི་ཕྱག་འགན་བཞེས་བཞིན་ཡོད།།
གཏམ་བཤད་བཅུད་དོན། Abstract[edit]
རིགས་ཁམས་བདེ་གཤེགས་སྙིང་པོའི་རྣམ་བཞག་པད་དཀར་དགྱེས་པའི་མཆོད་སྤྲིན།
སློབ་དཔོན་དམ་ཆོས་རྡོ་རྗེའི་གཏམ་བཤད་བཅུད་དོན།
རིགས་ཁམས་བདེ་བཤེགས་སྙིང་པོའི་རྣམ་བཞག་རང་སྡེ་དངོས་སྨྲ་བ་རྣམས་ཀྱིས་འདོད་ཚུལ་མདོར་མཚོན་པ་སྤྱི་དང་། ཁྱད་པར་དབུ་མ་པས་བཞེད་ཚུལ་ལྟར་དུ་རྒྱལ་དང་དེའི་སྲས་རྣམས་ཀྱི་གསུང་རབ་རྣམས་དང་། བྱེ་བྲག་འབྲུག་ཆེན་ཐམས་ཅད་མཁྱེན་པ་པདྨ་དཀར་པོ་རྗེས་འབྲང་དང་བཅས་པའི་གསུང་འབུམ་ལ་ཁུངས་གཏུགས་ནས་རང་བློས་གང་འཇོན་ཞིག་ཞུ་རྒྱུ་ཡིན། དང་པོ་ལ་ཉན་ཐོས་སྡེ་གཉིས་ལས་ བྱེ་བྲག་སྨྲ་བས་སེམས་བྱུང་མ་ཆགས་པ་ལ་འཕགས་པའི་རིགས་སུ་འདོད་པ་དང་། མདོ་སྡེ་པས་རང་གི་འཐོབ་བྱར་གྱུར་པའི་དགྲ་བཅོམ་པའི་གོ་འཕང་འཐོབ་རུང་གི་རྒྱུའི་ཆ་ནས་བཞག་པའི་བག་ཆགས་ཀྱི་ངོ་བོར་གྱུར་པའི་སེམས་བྱུང་སེམས་པ་ལ་རིགས་སུའདོད་པའི་ཚུལ་དང་། སེམས་ཙམ་པས་རང་འབྲས་དགྲ་བཅོམ་པའི་གོ་འཕང་ཐོབ་རུང་གི་ཆ་ནས་བཞག་པའི་བག་ཆགས་སུ་གྱུར་པའི་དྲུག་པའི་ཡིད་ཀྱི་སྐྱེ་མཆེད་དེ་ལ་རིགས་སུ་འདོད་པའི་ཚུལ་དང་། དབུ་མ་པས་ཡིད་ཀྱི་རྣམ་པར་ཤེས་པའི་རབ་ཏུ་ཕྱེ་བའི་ཆོས་ཉིད་ལ་རིགས་སུ་བཞེད་པའི་ཚུལ་དང་། ཞར་བྱུང་རིགས་དང་འབྲེལ་ཡོད་ཀྱི་རྣམ་བཞག་གཞན་རྣམ་རྟོག་ཆོས་སྐུར་བཞེད་པའི་ཚུལ་སོགས་ཞུ་རྒྱུ་ཡིན།
