སློབ་དཔོན་ཟླ་བ་བཟང་པོ། Lopen Dawa Zangpo
གསུང་བཤད་པའི་རྣམ་ཐར་སྙིང་བསྡུས། Brief Speaker Profile[edit]
བལ་ཡུལ་མུ་གུམ་ཀརྨ་རོང་གི་རྨང་ཞེས་པའི་གྲོང་སྡེའི་དུད་ཁྱིམ་དུ་སྤྱི་ལོ་ ༡༩༩༨ ་ལ་འཁྲུངས། སྤྱི་ལོ་ ༢༠༠༦ ་ལ་ཇོ་ནང་བསྟན་པའི་གསལ་བྱེད་མཆོག་སྤྲུལ་རིན་པོ་ཆེ་བཀྲ་ཤིས་རྒྱལ་མཚན་དཔལ་བཟང་པོ་ལ་གཏུགས་ཏེ་བལ་ཡུལ་ཇོ་ནང་དགོན་ངེས་དོན་རྟག་བརྟན་བཤད་སྒྲུབ་ཆོས་འཁོར་གླིང་དུ་འཛུལ་ཞུགས་མཛད། དེ་ནས་བཅའ་འབུད་རྡུང་གསུམ་དང་སུམ་རྟགས་དག་གསུམ་སོགས་ཐུན་མོང་གི་རིག་གནས་བཅས་ལ་སྦྱངས་བརྩོན་གནང་ཤིང་། སྤྱི་ལོ་ ༢༠༡༠ ་ནས་མཁན་རིན་པོ་ཆེ་ངག་དབང་རིན་ཆེན་རྒྱ་མཚོ། དགེ་བཤེས་ལྷ་རམས་པ་དྲི་མེད་འོད་ཟེར་སོགས་ཀྱི་སྐུ་དྲུང་ནས་བསྡུས་གྲྭ། རྟགས་རིགས་སོགས་ཚད་མའི་སྐོར་གྱི་གཞུང་རྣམས་ལ་སྦྱང་པ་མཛད། ཇོ་ནང་བསྟན་པའི་རྒྱལ་ཚབ་མཁན་སྤྲུལ་ཆོས་ཀྱི་སྣང་བའི་སྐུའི་མདུན་ནས་དགེ་ཚུལ་དང་མཆོག་སྤྲུལ་འཇམ་དབྱངས་སྦྱིན་པའི་སྐུ་མདུན་ནས་བསྙེན་རྫོགས་ཀྱི་སྡོམ་པ་ཞུས། ཁྱད་པར་དུ་ཕྱི་ལོ་ ༢༠༡༦ ་ནས་མཁན་རིན་པོ་ཆེ་ངག་དབང་དགེ་འདུན་རྒྱ་མཚོ་ནས་སླར་ཡང་ཚད་མ་རྣམ་འགྲེལ་དང་ཕར་ཕྱིན་སོགས་གཞུང་ཆེན་བཀའ་པོད་ལྔ་དང་སྤྱོད་འཇུག་སོགས་ལམ་རིམ་གྱི་གཞུང་དུ་མ་ཁྲིད་ལུང་ཞུས་ཏེ། སྤྱི་ལོ་ ༢༠༢༢ ལ་བལ་ཡུལ་ཇོ་ནང་གཙུག་ལག་སློབ་གཉེར་ཁང་ནས་བསླབ་པ་མཐར་སོན་ནས་སློབ་དཔོན་གྱི་གནས་རིམ་དང་པོའི་ཕྱག་ཁྱེར་བཞེས་ཏེ། ད་ལྟ་བལ་ཡུལ་ཇོ་ནང་དགོན་དུ་སྐྱོར་དཔོན་གྱི་འགན་འཁུར་བཞིན་ཡོད་པ་ལགས།།
