མཁན་པོ་ཤེས་རབ་ཕུན་ཚོགས། Khenpo Sherab Phuntsho
གསུང་བཤད་པའི་རྣམ་ཐར་སྙིང་བསྡུས། Brief Speaker Profile[edit]
གཉེ་ཤང་བྲག་དཀར་དུ་འཁྲུངས་ཤིང་། ཆུང་དུས་མཆོད་རྟེན་བྱ་རུང་ཁ་ཤོར་གྱི་ཉེ་འདབས་ཁྲ་འགུ་བཀྲ་ཤིས་ཆོས་གླིང་དུ་ཞུགས་ཏེ་རབ་ཏུ་བྱུང་། ལོ་བཞིའི་རིང་འབུད་བརྡུང་དཀྲོལ་གསུམ། གཏོར་བཟོ་རྒྱན་སྤྲོས་སོགས་ཆོ་ག་ཕྱག་ལེན་སྐོར་ལ་སྦྱངས་བརྩོན་གནང་། སྤྱི་ལོ་ ༡༩༩༦ ་ལོར་གནས་མཆོག་སྟག་མོ་ལུས་སྦྱིན་དུ་ ༧ སྐྱབས་རྗེ་ཡོངས་འཛིན་མཁན་ཆེན་ཁྲ་འགུ་རིན་པོ་ཆེའི་བཤད་གྲྭར་ཞུགས་ཏེ། གཞུང་ཆེན་བཀའ་པོད་ལྔ་རིག་གནས་དང་བཅས་པ་ལ་སློབ་གཉེར་གནང་། དེ་རྗེས་སྐྱོར་དཔོན་ལོ་གསུམ་དང་། སྤྱི་ལོ་ ༢༠༠༣ ་ལོར། ཁྲ་འགུ་བཀྲ་ཤིས་ཆོས་གླིང་དགོན་དུ་མཁན་པོར་མངའ་གསོལ། ལོ་བཅོ་ལྔའི་རིང་བཤད་གྲྭར་དཔེ་ཁྲིད་ཀྱི་འགན་ཁུར་བཞེས་ཏེ་གཞུང་ཆེན་ཁག་འཆད་སྤེལ་གནང་། དེ་རྗེས་སྤྱི་ལོ་ ༢༠༡༦ ་ནས་ལོ་བཞི་ལྷག་ཙམ་གྱི་རིང་ལ་ཁྲ་འགུ་སྲས་མཁར་སྒྲུབ་ཁང་དུ་སྒྲུབ་བརྒྱུད་ཀརྨ་ཀམ་ཚང་གི་སྔོན་འགྲོ་དང་དངོས་གཞི་ཐབས་གྲོལ་གྱི་ཉམས་ལེན་སོགས་ཞུས་ཤིང་། ད་ལྟའི་འཆར་སླར་ཡང་ཁྲ་འགུ་བཤད་གྲྭ་བཛྲ་བིདྱཱར་གཞུང་ཆེན་ཁག་གི་དཔེ་ཁྲིད་ཀྱི་འགན་ཁུར་བཞེས་བཞིན་བཞུགས། རྩོམ་གཞུང་ལ། དབུ་མ་དྭགས་བརྒྱུད་གྲུབ་ཤིང་གི་སྤྱི་དོན། དབུ་མ་གཞན་སྟོང་ལ་འཇུག་པའི་སྒོ་གོང་མའི་གསུང་གི་བདུད་རྩི། ཤེར་ཕྱིན་རྗེ་བཙུན་ངལ་གསོའི་ཟུར་མཆན་མི་བསྐྱོད་ཞལ་ལུང་། གཞི་གསུམ་གྱི་རྣམ་གཞག་མདོར་བསྡུས། ཀར་རབས་བཅུ་བདུན་གྱི་རྣམ་ཐར་སྙིང་བསྡུས། འགྲོ་མགོན་བཀའ་བརྒྱུད་པའི་རྒྱལ་བ་གོང་མ་རྣམ་ལྔའི་རྣམ་ཐར་སྙིང་བསྡུས། ནང་ཆོས་ངོ་སྤྲོད། དུས་འཁོར་བསྡུས་རྒྱུད་ལས་གསུངས་པའི་ཕྱག་རྒྱའི་ངོས་འཛིན། དུས་ཀྱི་འཁོར་ལོའི་སྐུ་གསུང་ཐུགས་དཀྱིལ་གྱི་ལྷ་ཚོགས་དྲུག་བརྒྱ་སོ་དྲུག་གི་ངོས་འཛིན། ཀུན་རིག་གི་ཕྱག་རྒྱ་བཅའ་ཚུལ་སོགས་བཞུགས།།
